Heilnæmur haustdrykkur

Möndluhristingur með kanil

Þessi silkimjúki hristingur er styrkjandi og nærandi fyrir haustmánuðina. Á haustin notar líkaminn alla orkuna til að byggja sig upp fyrir veturinn. Haustið er þurrkandi tími, með sína vindasömu og breytilegu veðráttu. Þetta er tími sem við þurfum að huga vel að því að fá nægan vökva. Þegar okkur vantar vökva verðum við þreytt og orkulaus. Hugurinn verður ofvirkur og stekkur úr einu í annað. Svefnleysi getur gert vart við sig á þessum árstíma og aukið álagið. Á haustin er mikilvægt að finna sér takt og rútínu í deginum og huga vel að því að næra og vökva líkamann og þá um leið hugann. Þessi blanda af nærandi döðlum og jarðtengjandi möndlumjólk getur hjálpað þér að finna jafnvægi fyrir líkamann og kyrra hugann og njóta sætleika lífsins.

Innihaldsefni:
1 bolli möndlumjólk
2 klípur af kanil
2 heilar döðlur (þurrkaðar og best ef þær hafa legið í bleyti í 4 tíma en ekki nauðsynlegt)
Lítill biti (ca. 0,5 sm) af engifer
Skvetta af vanilludropum eða smá klípa af vanilludufti (valkvæmt)
1 tsk ghee eða möndlusmjör (valkvæmt)

Leiðbeiningar

  1. Taktu steininn úr döðlunum (ef það á við)
  2. Hitaðu möndlumjólkina eða hafðu hana við stofuhita eftir því hvað þér finnst best. Heit mjólk er róandi og nærandi drykkur fyrir svefninn
  3. Settu allt í blandara
  4. Ef þú vilt gera drykkinn enn meira endurnærandi, geturðu bætt við 1 tsk af ghee eða möndlusmjöri og sett kúamjólk eða kókosmjólk í stað möndlumjólkur.

Heildræn heilsuráðgjöf

Ég býð upp á heildræna heilsuráðgjöf og get boðið þér að koma og fá stuðning við að greina líkamsgerð þína og finna hvað þú þarft til að finna betra jafnvægi á huga og líkama. Velkomið að senda mér tölvupóst ef þú vilt fá nánari upplýsingar.

Flokkar

Nýjast

Sumarsamhljómur

Sumarsamhljómur

Nokkrar hugleiðingar um sumarið og gjafir sumarsins Sumarsamhljómur ... er þegar ég finn taktinn minn renna saman við takt náttúrunnar. Við verðum eitt. Náttúran hjálpar mér að finna – að skynja – líka það sem mér finnst vanta. Það sem ég sakna. Andstæðan við samhljóm...

Heilsan og fríið

Heilsan og fríið

Þegar 3ja ára barnabarnið mitt er í heimsókn í sveitinni þá lætur hann vita þegar hann er búinn að fá nóg af aksjón. Þá biður hann um að vera heima í rólegheitum með ömmu, jafnvel þegar hinir í fjölskyldunni eru að fara í ævintýraleiðangur. Hann veit hvað hann þarf....

Að lifa ríkulega

Að lifa ríkulega

Ef ég gæti gefið þér eitthvað dýrmætt þá væri það líf sem er ríkt af prönu, lífsorku. Prana er orð sem kemur úr sanskrít og merkir bæði öndun og lífsorka. Orkan sem bæði hugurinn og líkaminn nærast á. Prana er lífgjafinn þinn. Með næga prönu hefurðu hæfileikann til...

Um mig

Ég heiti Guðrún. Jógakennari, rithöfundur, markþjálfi og hómópati.

Ég elska að skrifa. Skrif hjálpa mér að heyra hvísl lífsins í gegn um skarkala heimsins.

Ég styð fólk í að finna jafnvægi í óstöðugum heimi. Að gefa heilsunni rými og hlusta eftir því sem hjartað býður, fram hjá sjálfsgagnrýni og kröfum umhverfisins. Að horfa út, ekki bara um augun í höfðinu heldur líka augu líkamans. Og að skynja töfrana sem búa í Andartakinu.