Ef ég gæti gefið þér eitthvað dýrmætt þá væri það líf sem er ríkt af prönu, lífsorku. Prana er orð sem kemur úr sanskrít og merkir bæði öndun og lífsorka. Orkan sem bæði hugurinn og líkaminn nærast á. Prana er lífgjafinn þinn. Með næga prönu hefurðu hæfileikann til þess að lifa til fulls. Að lifa ríkulega.
Prana nærir heilsuna og gefur þér líkamlega og andlega lífsorku. Hún styður þig í að vera skapandi. Að halda í jákvæðnina og sjá tækifærin. Hún er lykill að vídd óendanleikans innra með þér. Prana hjálpar þér að melta áskoranir lífsins. Þegar þú upplifir streitu þá er mikilvægt að hlúa að prönunni – næra lífsorkuna. Það eru til ýmsar leiðir til þess. Ein einfaldasta leiðin er að virkja andardráttinn.
Víxlöndun
Andardrátturinn nærir allar frumur líkamans og er afar mikilvægur fyrir alla heilastarfsemi. Hér er öndunaræfing sem getur stutt þig í að finna jafnvægi í deginum
- Komdu þér fyrir í þægilegri stöðu, sitjandi á stól eða með krosslagða fætur.
- Notaðu þumal og baugfingur á hægri hendi (eða vinstri ef það hentar betur).
- Lokaðu vinstri nös með baugfingri og andaðu djúpt inn um hægri nös.
- Lokaðu svo hægri nös með þumlinum og andaðu út um vinstri nös.
- Andaðu djúpt inn um vinstri nös, lokaðu henni og andaðu út um hægri.
- Haltu áfram í 3–5 mínútur, eða þar til þú finnur fyrir innri ró og jafnvægi.
Þessi einfalda öndunaræfing getur verið góð byrjun á því að næra lífsorku og innri ró – sérstaklega í gegnum álagstímabil og þegar þú finnur fyrir kvíða eða orkuleysi. Það þarf ekki að vera langur tími – jafnvel örstutt stund þar sem þú tengir við líkamann getur skipt sköpum. Stund með þér þar sem þú tengir við líkamann og kemur jafnvægi á taugakerfið.
Á breytingaskeiði verður líkaminn viðkvæmari fyrir áreiti. Þegar mikil orka fer í upplifun á streitu þá verður eftir minni orka fyrir friðsæld. Með einföldum verkfærum eins og meðvitaðri öndun getum við byggt hana aftur upp – skref fyrir skref.
