Þetta er algeng spurning…
…hjá konum sem eru að fara í gegnum breytingatímabil. Ekki síst þeim sem eru á – eða hafa lokið breytingaskeiði. Þær lýsa líkamlegum og tilfinningalegum einkennum sem oft virðast sundurlaus og erfitt að ná utan um. Þetta getur verið mjög ruglandi tími.
- „Ég er þreytt – en á samt erfitt með að slaka á.“
- „Ég vakna á nóttunni, stundum aftur og aftur á sama tíma. Og hugurinn verður að óviðráðanlegum stormi.“
- „Orkan dettur niður um þrjúleitið. Þá fer ég að sækja í kaffi eða sykur til að halda mér gangandi.“
- „Ég reyni að borða hollt og hreyfa mig… en orkan mín er svo breytileg. Ég veit aldrei hvernig ég vakna næsta dag.“
En þetta snýst ekki bara um svefn, næringu eða góðan ásetning.
Það snýst um eitthvað dýpra.
Það getur verið ómeðvitað.
En líkaminn þinn veit…
Líkaminn sem brú
Rithöfundurinn Mark Nepo lýsir líkamanum sem brú. Brú á milli innri og ytri veruleika okkar.
Einkenni, óþægindi og verkir segja okkur hvar álagið er mest og hvar brúin þarfnast styrkingar.
Hvar við þurfum að hvíla. Hvar við þurfum að hlusta.
Hverju við þurfum að hlúa að — svo við getum haldið áfram að tengja saman innri og ytri reynslu.
Streita er merki um að sú orka sem er okkur aðgengileg sé minni en kröfur umhverfisins (ímyndaðar eða raunverulegar). Og minni en þær kröfur sem við gerum til okkar sjálfra.
Þegar við förum í gegnum breytingaskeið lífsins verðum við að hlúa sérstaklega vel að þessari brú. Líkaminn er ekki að biðja okkur um að hætta að lifa lífinu.
Hann er að biðja okkur um að lifa dýpra. Að hlusta betur.
Nærandi augnablik
Í daglegu lífi þar sem áreitið er stöðugt getur það virst óyfirstíganlegt að finna tíma til að hlúa að sjálfri sér.
En stundir fyrir þig þurfa ekki að vera langar eða flóknar. Þær þurfa bara að vera meðvitað val.
Fimm mínútna öndunaræfing.
Notaleg stund með tebolla.
Stutt gönguferð.
Að loka augunum í augnablik og anda að þér ferskri norðanáttinni.
Þessi augnablik geta létt á spennu og gefið þér orku og stöðugleika í dagsins önn. Þú færð stundarfjarlægð á verkefnin þín. Á eftir sérðu þau í ferskara ljósi.
Það að hlúa að sjálfri sér er ekki munaður heldur nauðsyn.
Og þetta á sérstaklega við á breytingaskeiði.
Að safna gæðastundum
Ef þú gefur þér svona stundir reglulega fara þær að safnast upp og hafa smám saman enn dýpri áhrif.
Með því að setja sjálfa þig í fyrsta sæti, þó ekki sé nema í örfáar mínútur í senn, ertu ekki aðeins að styrkja þig og bæta líf þitt heldur líka líf þeirra sem eru þér næstir. Þú verður sáttari, glaðari og meira til staðar fyrir lífið og fólkið í kringum þig.
Þetta er besta gjöfin sem þú getur gefið sjálfri þér.
Það er þess virði af því þú ert þess virði.
Ef þú vilt meira
Ef þú ert ný hér — og svefn eða orkuleysi eru áskoranir í þínu lífi — þá hvet ég þig til að skoða þetta fría örnámskeið sem ég bjó til:
Svefntruflanir og hitakóf
Námskeiðið gefur þér aukinn skilning á því hvað er að gerast í líkamanum á breytingaskeiði. Af hverju svefninn truflast og hvernig þú getur byrjað að styðja við sjálfa þig.
Ef þú misstir af síðasta pistli – eða vilt rifja hann upp – þá fjallaði hann um einkenni breytingaskeiðsins í heildrænu ljósi. Þú getur lesið hann hér: Svefn, kvíði og hitakóf í stærra samhengi
