Ég átti svo gott samtal við nokkrar konur sem eru á námskeiði hjá mér nýlega. Við ræddum um breytingaskeiðið, ekki sem hindrun heldur sem tækifæri til að finna sjálfa sig aftur og opna á nýja möguleika.
Þetta er tími þar sem við erum ekki lengur með sömu ábyrgð og áður. Lífið er að breytast – og nú stendur eftir öðruvísi ábyrgð. Ábyrgðin sem snýr að okkur sjálfum: Að lifa lífinu til fulls.
Það getur kallað fram stórar spurningar:
- Hvernig lífi vil ég lifa?
- Í hvað vil ég eyða orkunni minni?
- Hverjum vil ég eyða tíma mínum með?
Eins og ein í hópnum orðaði það: „Lífið er svo stutt. Maður á að velja vel.“
Að stíga skrefið inn í nýja útgáfu af sjálfri sér
Við konur höfum oft gengið svo lengi með alls konar hluti í maganum. Hugmyndir sem við höfum ekki leyft okkur að framkvæma. Löngun til að taka skref. En oft verða hik og efasemdir til þess að við höldum aftur af okkur.
Það er svo gefandi að finna kraftinn sem kemur þegar við erum tilbúnar að hlusta á okkur sjálfar. Þegar við sleppum öllu samviskubiti og förum að velja meðvitað. Þegar við gefum okkur rými til að nærast og næra aðra á okkar forsendum.
En oft er þessi staður í okkur hulinn ótta, orkuleysi og efasemdum. Við hættum að heyra í okkur sjálfum.
Til að komast þangað þurfum við fyrst að mæta því sem er. Að leyfa okkur að finna hvernig okkur líður og hvað við þurfum. Og fá stuðning til að takast á við einkennin sem fylgja þessu blessaða skeiði.
Breytingaskeiðið er viðkvæmt umræðuefni
Það er svo algengt að konur tali ekki um breytingaskeiðið við sína nánustu.
Ég áttaði mig á því þegar ég fór að öðlast betri skilning á því sem er að gerast í líkamanum að þá varð auðveldara að ræða um það við fólkið mitt. Og það varð auðveldara fyrir þau að vera til staðar.
En það er líka ómetanlegt að tala við aðrar konur sem eru á sama stað. Að hlusta á reynslu annarra og finna að við erum ekki einar.
Hvað styður þig í að blómstra? Ég hvet þig til að taka þessa hugleiðingu með þér í næsta göngutúr.
Bætt líðan á breytingaskeiði
Ég býð upp á frítt 3ja daga netnámskeið fyrir konur á breytingaskeiði: 18.-20. mars.
Við skoðum náttúrulegar leiðir til að bæta líðan, að skilja hvað er raunverulega að gerast í líkamanum og hvernig þú getur byrjað að stíga aftur inn í kraftinn þinn.
Breytingaskeiðið er ekki tími sem við eigum að reyna að þrauka einar í gegnum. Við þurfum hver á annarri að halda til að blómstra
Þú getur smellt á hlekkinn hér til að skoða námskeiðið og skrá þig: Bætt líðan á breytingaskeiði
